આખા ગુજરાતમાં આવા રોડ હોવા જોઈએ, 6 વર્ષ થયા એક પણ ખાડો નથી પડ્યો

કોઈ એવું કહે કે સુરતનો એક રોડ એવો છે જ્યાં છેલ્લાં 6 વર્ષથી ખાડા પડ્યા નથી. તો કોઈ વિશ્વાસ કરશે નહીં. પણ આ સત્ય હકીકત છે. સુરતમાં 6 વર્ષ પહેલાં એક એવો રોડ બન્યો હતો જેમાં વરસાદમાં પણ ખાડા પડ્યાં નથી.

શહેરના અઠવાલાઈન્સ સ્થિત ગોકુલમ ડેરી ખાતે છ વર્ષ પહેલા સિમેન્ટ ગ્રાઉટેડ બિટ્યુમિનસ મિક્સ ટેક્નોલોજીથી 120 મીટરનો ટ્રાયલ સેક્શન રોડ બનાવવામાં આવ્યો હતો. વરિષ્ઠ વૈજ્ઞાનિક અને સેન્ટ્રલ રોડ રિસર્ચ ઈન્સ્ટીટયુટના પૂર્વ વિભાગીય વડા મનોજ શુક્લાએ આ રોડની મુલાકાત લઈ તેની મજબૂતી અને ગુણવત્તા ચકાસવા માટે સ્થળ નિરીક્ષણ કર્યું હતું, જેમાં તેઓએ આ ટેકનોલોજીથી નિર્માણ પામેલ બિટ્યુમિનસ કોન્ક્રીટ રોડ ટકાઉ હોવાથી અન્ય વિસ્તારો, શહેરોમાં પણ તેના નિર્માણનો પ્રયોગ કરી શકાય છે એવો મત વ્યક્ત કર્યો હતો.

સામાન્ય રીતે ચોમાસામાં પાણી ભરાવાથી ડામર રોડમાં ખાડા પડે છે, પરંતુ છ વરસાદી સિઝન પસાર થઈ હોવા છતાં અહીં ખાડા, તિરાડો કે ભંગાણ સર્જાયું નથી. અઠવામાં ગોકુલમ ડેરી પાસે છ વર્ષ પહેલા બનાવેલા બિટ્યુમિનસ કોંક્રિટ રોડ પર એકપણ ખાડો પડ્યો નથી. સુરતમાં CGBM ટેકનોલોજીથી બનેલો 120 મીટરનો રોડ મજબૂતી અને ગુણવત્તાની પરીક્ષામાં પાસ થયો છે.

મનોજ શુક્લાએ જણાવ્યું હતું કે, CGBM ટેક્નોલૉજીથી જૂન-2017 માં સુરતના અઠવાલાઈન્સ વિસ્તારમાં ટ્રાયલ સેક્શન માટે બનાવવામાં આવેલા રસ્તાની આજ સુધી કોઈ પણ પ્રકારની મરામત કરવાની જરૂર પડી નથી. સામાન્ય રીતે ચોમાસામાં પાણી ભરાવાથી ડામર રોડમાં ખાડા પડે છે, પરંતુ છ વરસાદી સિઝન પસાર થઈ હોવા છતાં અહીં ખાડા, તિરાડો કે ભંગાણ સર્જાયું નથી.

દર વર્ષે અમારી સંસ્થા દ્વારા આ રસ્તાનું નિરક્ષણ કરવામાં આવે છે, જેના આધારે હજુ આવનારા 5 વર્ષ સુધી આ રોડનું મેન્ટેન્સ કરવાની જરૂર પડશે નહિ. કારણ કે રોડ બનાવવામાં મુખ્યત્વે ઓપન ગ્રેડેડ એગ્રીગેટ્સ જેવા મિશ્રણોનો ઉપયોગ કરવામાં આવ્યો છે, જે સામાન્ય રીતે સિમેન્ટ, રેતી, ફ્લાય એશ, માઈક્રો સિલિકા, સુપર પ્લાસ્ટિસાઈઝર અને પાણીથી બનેલું હોય છે, જેથી રોડ મજબુત અને ટકાઉ બને છે.

વધુમાં તેમણે જણાવ્યું કે, સુરત, વાપી અને વડોદરામાં આ પ્રકારના બિટ્યુમિનસ કોન્ક્રીટ રોડ બનાવવાનું કાર્ય પ્રગતિમાં છે. જેમાં CRRI રિસર્ચ પાર્ટનર ડો.સુમન ચક્રવર્તી, SVNIT -સુરતના પ્રો.જી.જે.જોષી તથા મેટટેસ્ટ લેબોરેટરી-સુરતના એમ.ડી. વિશાલ રૈયાણી સહાયરૂપ થશે.