પ્રમુખ સ્વામી જન્મ શતાબ્દી મહોત્સવમાં બિઝનેસ પરિવારની મહિલાઓ ઊંચકે છે તગારાં

ભક્તિમાં તરબોળ કરતો અમદાવાદનો પ્રમુખ સ્વામી જન્મશ તાબ્દી મહોત્સવ. તેમાં ભાગ લેવા દેશના જ નહિ વિદેશના પણ સત્સંગીઓ આવી ગયા છે. ત્યારે બોર્ન વિથ ધ ગોલ્ડન સ્પૂનવાળી કહેવતને અવાર-નવાર પૂંજીપતિઓને ઉતારી પાડવા માટે વપરાતી હોય છે, પણ પ્રમુખ સ્વામી નગર રચવાના ચાલી રહેલા કામમાં ભરબપોરે તગારાં ઊંચકીને મજૂરી જેવું કામ કરતી આ નણંદ અને ભાભીએ આ કહેવતને પણ નવો અર્થ પ્રદાન કર્યો છે.

દાન આપીને કે સોફેસ્ટિકેટેડ સેવા આપવાને બદલે રોડાં ભરેલાં તગારાં ઊંચકવાં, ફૂલ-છોડનાં કૂંડા ઉપાડવાં જેવું કામ કરવાનું પસંદ કરનાર બે યુવતીઓએ તેમના સેવા યજ્ઞની સુવાસ ચારે તરફ તો ફેલાવી જ છે પણ કોઇ પણ કામ નાનું નથી હોતું અને જો ખરી સેવા કરવી જ હોય તો કષ્ટ વેઠીને પણ સામાન્ય સેવકની જેમ જ સેવા કરવી જોઇએ તે વાતનું સજ્જડ ઉદાહરણ પૂરું પાડ્યું છે.

હા, આ બે યુવતીઓમાંથી એક છે ગોરલ અજમેરા, જે 5000 કરોડથી વધુનું નેટવર્થ ધરાવતા અજમેરા પરિવારની પુત્રવધૂ અને સુરતના ડાયમંડ કિંગ ગણાતા અને એટલો જ મોટો બિઝનસ ધરાવતા લવજી બાદશાહની પુત્રી છે. જ્યારે બીજી યુવતી અજમેરા પરિવારનાં જ આજ્ઞાબેન છે. ગોરલબેન હાથમાં ઇજા થઈ હતી. છતાં સેવાનું કામ ચાલુ રાખ્યું છે.

હું બ્રહ્મવિહારી સ્વામીની પ્રેરણાથી હાલ શતાબ્દી મહોત્સવમાં પીઆરની સેવા આપી રહ્યો છું. વીઆઇપીઓને આમંત્રણ આપવું, તેનું રોજેરોજ ફોલોઅપ કરવું, તેમના એકોમોડેશન તેમજ ટ્રાન્સપોર્ટની વ્યવસ્થા કરવાની હોય છે. અગાઉ સાળંગપુરમાં રહેતા ત્યારે જમવાની તેમજ જનરલ વ્યવસ્થા કરવાની, વાસણ ધોવાનાં, સાફસૂફી કરવાનું કામ કરતાં હતાં. નાના હતા ત્યારે બહેન સાથે તપેલાંમાં બેસી જઇ તેને ઘસતાં હતાં. હું 11 વર્ષનો હતો ત્યારે પણ પ્રમુખસ્વામી મહારાજે મને પીઆરની જવાબદારી સોંપી હતી. – મયૂર અજમેરા, અજમેરા ગ્રૂપ ઓફ કંપનીઝ

પ્રમુખસ્વામી જન્મ શતાબ્દી મહોત્સવમાં 55 હજાર સ્વયંસેવકો તો વિદેશથી આવ્યા છે. દેશભરમાંથી આવેલા લોકો પૈકી વિમલ ડેરીના માલિક જયેશ પટેલ, સિન્ટેક્સના યોગેશ પટેલ, ઝાયડસના અનિષ પટેલ, અજમેરા ગ્રૂપના વિમલ મહેતા, પૂર્વ મુખ્યમંત્રી બાબુભાઇ જશભાઇ પટેલના પૌત્ર સહિતના કેટલાય ઉદ્યોગપતિઓ, ડોક્ટર્સ, વકીલ, વેપારીઓ સહિત હજારો વ્યક્તિ સેવા આપી રહ્યા છે.